Na Kekahi Hoʻopaneʻe a FEMA E Hoʻopaʻa I Kēia ʻOhana Ma Kekahi Keʻena Noho Waiwai No Hoʻokahi Mahina Hou Aku
He keiki papa ʻo Randy Dadez no Lahaina, a ke moemoeā nei ʻo ia i ke kūkulu hou ʻana i kona home wā keiki i ʻai ʻia e ke ahi.
Kā ka luna hoʻoponopono nota: Unuhi ʻia na Ākea Kahikina.here to read this article in English.
I kekahi mau lā ma mua pono o ka neʻe ʻana o ka ʻohana Dadez mai ke keʻena noho i uku ʻia e FEMA, ua loaʻa mai kekahi kelekiko iā Randy Dadez: Hiki i kona ʻohana ke noho paʻa no hoʻokahi mahina hou aku ma laila.
ʻO kēia nō ke kolu o ka hoʻopaneʻe ʻia ʻana “ma ka hola ʻumikūmākahi” o ka haʻalele ʻana i kēia keʻena noho waiwai i kū me he home lā no lākou no nā mahina he ʻekolu me ka hapa.
Ua pā kona naʻau i ka hopohopo ʻole me he nalu lā.
ʻO ka mea i hana ʻia, wahi a Randy i aʻo mai ai, ʻo ia nō ka ʻaelike ʻana o ka ʻona o ua keʻena noho nei ma ka Honua Kai Resort e hoʻomau aku i ka palapala ʻaelike me FEMA no ka hoʻonoho paʻa ʻana i ka ʻohana Dadezes a hiki i ka hopena o Pepeluali. Ma ka wā like, ke hana nei kekahi hui ʻoihana i hai ʻia e FEMA e hoʻoneʻe i kēia ʻohana mai ka hōkele mākaʻikaʻi a i kekahi hale noho loa.
ʻO ka hoʻoneʻe ʻia ʻana o ka ʻohana, ʻo ia nō kekahi māhele o ka hana e hoʻoneʻe aku ai i nā luaahi ahi mai nā hōkele a i nā kūlanakauhale. ʻO ke keʻena pekelala nona ke kuleana no ka hoʻohale ʻana i nā luaahi he mau kaukani no Lahaina, na ia keʻena i hoʻohiki i ka ʻohana Dadezes i ka ʻimi ʻana i hale he ʻelima lumi ma Lahaina no lākou. Pēlā nō ka hoʻohiki ʻana i nā ʻohana ʻē aʻe he mau haneli.
Wahi a Randy, ua haʻi ʻia kona ʻohana, hiki iā lākou ke noho ma ka hale a hiki i ka hopena o Pepeluali i kēia makahiki e hiki mai ana. No ka ʻike kikoʻī i pili i kahi e noho ai ka hale, ʻaʻole i maopopo iki. ʻO ka mea naʻe i maopopo, aia nō ia hale ma Lahaina, a ʻelima ona lumi — a ʻoi aku ka nui o ia hale ma mua o nā hale a ka ʻohana Dadez i noho ai ma mua.
Wahi a kekahi limahana mai Lima Charlie, he hui ʻohana ma Kaleponi i hai ʻia e FEMA no ka hoʻohale ʻana i nā kamaʻāina no Lahaina, ua haʻi ʻia nō ka helu wahi noho o ka hale ma kahi leka leo ma kā Randy kelepona. Akā, ʻaʻole mōakāka ka inoa o ke alahele iā Randy ma ka hoʻolohe ʻana, a ʻaʻole i pane mai ka limahana o Lima Charlie i kāna mau kāhea no ka ʻike hou aku.
“ʻAʻole au nānā, ʻaʻohe oʻu hopohopo — ʻaʻole i kēia manawa — no ka mea, ʻike leʻa au, hiki iā kākou ke noho paʻa ma ʻaneʻi,” wahi a Randy i pili i ke keʻena noho e noho ai kona ʻohana he ʻeono kānaka a me ke kāne a kāna kaikamahine hiapo.
ʻO ke keʻena noho i loaʻa ai ʻekolu lumi moe, kekahi lānai pili kahakai, nā kīwī like ʻole, a me kekahi lumi kuke nani loa, he wahi ʻoluʻolu loa ia no ko ka ʻohana hoʻoponopono ʻana ma hope o ka pau ʻana o ko lākou home hoʻolimalima he ʻelua lumi a me ka hoʻohaunaele ʻia ʻana o ko lākou mau ola.
Ma mua o kēia wahi, ua neʻe pinepine ka ʻohana ma waena o kekahi hale pule a me ʻelua lumi hōkele i uku ʻia e FEMA. Ma ua mau lumi hōkele nei, ʻaʻole loaʻa ka lumi kuke a me nā mīkini kuke, a ʻo ko lākou kaukaʻi ʻana i ka hāʻawi manawaleʻa ʻana mai i ka meaʻai, a i ʻole, ua pono kākou e kūʻai i ka meaʻai mai nā hale ʻaina mai.
“I kekahi mau manawa, penei koʻu noʻonoʻo, ʻaʻole hiki ke piliwi i ka nalowale ʻokoʻa ʻana,” wahi a Randy i pili i ka hale hoʻolimalima he ʻelua lumi ma ke alahele ʻo Kaniau, kahi i noho ai kona ʻohana ma mua o ke ahi. “A, i hoʻokahi minuke ma hope aku, penei koʻu noʻonoʻo, mau nō ka pōmaikaʻi. Maikaʻi wale mākou a pau. Paʻakikī nō, akā, nui koʻu mahalo i ke kōkua ʻia ʻana, loaʻa nō nā kānaka nāna e mālama nui mai iā mākou.”
Ma ke kakahiaka i pono mua ai ka neʻe ʻana i kekahi hale hou, ua kalaiwa ʻo Randy me kāna wahine ʻo Marilou me kā lāua mau keiki ʻōpioio ʻelua i nā hālāwai kauka ma ke keʻena like. Nānā a hoʻomaʻemaʻe ʻia nā niho o nā mākua e kekahi kauka niho. Nānā ʻia ke kuamoʻo o Samara, 13. Nānā ʻia ka pepeiao o Kobe, 9, no ka lapaʻau ʻana i kona pilikia lohe.
Holo pono nā hālāwai kauka a pau.
“ʻO ka mea nui i kēia manawa, ʻo ia nō ke olakino o koʻu ʻohana,” wahi a Randy ma ke kalaiwa ʻana mai nā hālāwai mai. “Hoʻāʻo wau e hoʻēmi i ka hopohopo o lākou, ka hopohopo hoʻi i pili i nā mea a pau i holo mai nei. Hoʻāʻo wau e kū me he meʻe lā. Wahi a ka poʻe, he kuleana nui kēlā, a noʻu iho naʻe, he wahi māhele ia o ke kuleana makua.”
ʻO kā Civil Beat kūkala nūhou ʻana i pili i ke Kalana o Maui, ke uku hapa ʻia e nā haʻawina kālā mai ka Nuestro Futuro Foundation.
Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.
