������Ƶ

AS LITO, Saipan – Dumenga si Abraham Taimanao gi dos grånon sin ya ha håtsa i mattiyu-ña para u na’danña’ yan u na’yånu.

I sin para i atof i nuebu na kasiyas månnok ni ha fa’titinas si Taimanao, hihot gi filan tinanom donne’ yan otro siha na tinanom ni’ ha fa’gualulu’i.

Ti tano’-ña este si Taimanao. Ti ha tungo’ magåhet håyi gai’iyo. Låo mafatto i idåt 60 åños guini kada dia para u na’hasso gue’ nu i tano’-ña — i gualo’-ña gi islan Luta, kasi media ora ha’ guatu na chinago’ gi batkonaire.

“Humuhuyong yu’ guini pot para bai hu gai pås gi titanos-hu, tåya’ hinasson daialasis, tåya’ hinasson hafkao, låo pot para bai hu gosa ha’ i lina’la’ taiguihi hagas bidåda-hu giya Luta,” ilek Taimanao.

Gi otro båndan chålan gaige i hinatsan pådet ni’ si Taimanao yan otro na pasienten daialasis siha ma fa’sagågayi disde ki manmasangåni na ma nisisita manma-daialasis tres biåhi gi simåna pot para u fanlå’la’.

Gi Commonwealth i Notte Marianas, i solu na sentron daialasis manggaige gi islan kapitåt Saipan. I residente siha gi i bisinu na islas Tinian yan Luta, mayoria natibu na Chamorro, ma muebi siha para Saipan pot para u marisibi este na nana’lå’la’ na inamte. Giya Tinian kasi 3,000 na residente mañåsaga, ya i populasión Luta kasi 1,800. Kanna’ dos dusena giya siha mañåsaga giya Saipan solamente pot para u fanma-daialasis.

I daiabetes, i primet rason i chetnot riñon, dångkulu na problema gi i teritorion Estådos Unidos, espesiåtmente entre i komunidåt tåotåo Pasifiku. Un survey gi 2016 na sakkan, i mas nuebu na survey guaha, ha estitima na maseha achok i binibon daiabetes 12.5 pot siento entre todu i manåmko’ gi commonwealth, i estimasion humuyong tumakhilo’ era unu gi halom singko na åmko’ Chamorro yan un tetseru gi todu åmko’ gi mås ki 65 åños na idåt.

I kinantidan daiabetes gi Notte Marianas muna’kahuhulo’ i diniseha para daialasis. Gi 2018 na sakkan, i solu ospitåt Saipan, i Commonwealth Health Corp., eståba didide’ mas ki un siento na pasienten daialasis, låo på’go i numiru entre 170 yan 180, ilek Nikki Villagomez, i gume’hilulu’ i klinik daialasis i espitåt.

“Apmam tiempo na fitme i kinahulo’ pasiente. Gotpe ha’ kulan kumahulo’ chaddek,” ilek Villagomez. “Hu a’atan na siempre kahulo’ mås gi futura.”

Problema i daiabetes gi todu i Pasifiku ya ha afuefuetsas i taotao ginen meggai na isla giya Micronesia para u ma muebi siha para Hawaii yan otro lugåt gi iya Estådos Unidos pot para u fanmanrisibi i ginagagao na inamte.

Gi Notte Mariånas, i dinisehan daialasis gi i bisinu siha na isla ti uma’afakcha’ trabiha yan i håfa guaha para daialasis. I hagas inaligao empeñu para u mababa sentro giya Luta sinedda’ ni probleman mañodda’ empleao.

I Konggresu mafa’sahnge mas ki 500 mit pesos gi fondon i adelanton i hiyong-siudå (rural development funding) para u ma ayuda i pasiente siha u ma cho’gue i daialasis gi-gima’, un sigi ha’ kahulo’ na kinalamten gi nasion. Låo meggai na pasiente giya Tinian yan Luta ni’ mañåsaga Saipan manma’åñao manmatåtme yanggen para siha ha’ mismo para u ma cho’guen maisa i daialasis, ya håfa malago’-ñiha i para u fanláhihot yan i mediku yan siyan hemodialysis tåtte gi tano’-ñiha.

Mientras tanto, meggai na residenten Tinian yan Luta manma muebi siha para Saipan para inamte, manma dingu i gima’-ñiha, ga’chong-ñiha yan i pinayon-ñiha nu ayu siha na ládikike’ isla.

I daialasis giya Saipan ha na’fanlåla’la’ i pasiente siha taiguihi as Taimanao, låo i sakrifisio ti siña mañiha yan i guinaiyan-ñiha tåtte gi tano’-ñiha. Manfatta gi ha’ånen kumpleaños, fina’gupot yan seremonias tradisionåt taiguihi i nuebi-dia na lisåyon Chamorro ni mana’guaguaha para u ma onra i manmåtai na parentes yan i mañåntos i sengsong. I mas åpmam ni siña i pasienten daialasis u suhåyi i makina siha kuåttro dias.

Meggai ma tattiyi i mismo chålan taiguihi gi mañainan-ñiha. Ha bisisita si Taimanao si nanå-ña 20 años annai ma-daialasis giya Saipan åntes di ma håfot tåtte giya Luta. Ha diseseha na ti u fanaiguini i famagu’on-ña yan i nieto-ña siha.

“Debi Di Un Hånao”

Giya Luta, pumeskan ayuyu yan binådu si Taimanao, humånao pumeska yan mangonne’ haguåf para u na’fañochu i familiå-ña. Annai ha sodda’ na para u muebi gue’ para Saipan, ha faisen i asaguå-ña, “Månu na para ta sodda’i i nisisidåt famagu’on-ta?”

Ti parehu i areklon pumeska giya Saipan yan Luta, ni’ siña ha’ masedi gue’ na u peskan ayuyu.

“Debi di ta hånao sa’ para i hinemlo’-mu,” ineppe ni asaguå-ña. Ti ayugue’ finaisen-ña, låo nina’hasso ni’ asaguå-ña na siempre måtai yanggen sumåga, ya kumeke’ilek-ña na debi di u despidi i famagu’on-ña.

“Malalago’ ha’ yu’ na bai in fanali’e’ yan i famagu’on-hu,” ha sangåni i asaguå-ña.

“Debi di un hånao,” ineppe.

Parehu siha na kombetsasion gi otro na guma’ pasiente siha. Si Jesus Cruz, ha hasso taimanu si tatå-ña ha muebi gue’ tåtte Tinian despues di singko años ya ha desidi na para u muebi gue’ tåtte, achokka’ kumeke’ilek-ña na siempre u måtai.

Carlo Domingo/Civil Beat/2022

"Ti para bai hu såga guini todu i tiempo."

— Jesus Cruz

Manapåpasi si Jesus Cruz 91 pesos kada uttimon i simåna para u gupu tåtte para Tinian sa' ti ha hulat chumagu'i i tano'-ña. Otro na pasiente ti siña ma apåsi ennao.

Ti malago’ si tatå-ña na para u na’fañatsaga i familia-ña yanggen ha opbliga siha na u ma apåsi i tiket siha para Saipan, i hotel yan i inatkilan kareta komu mana’såga gi espitat gi intensive care unit.

“Ginagagao salåpe’. Pues ilek-ña si tatå-hu, basta,” ilek Cruz, på’go 60 años. Mandanña’ i familia giya Tinian gi fi’on i tatan-ñiha annai måtai gi 1998 na sakkan.

Unos kuåntos años mo’na annai masangåni si Cruz na ha nisisita na u ma-daialasis, kuåtro años na ha kesuhåyi sa’ munga gue’ na u dingu i gima’-ña yan i lina’la’-ña giya Tinian. Masohyo’ gue’ ni famaguon-ña yan i nieto-ña para u hånao ya u ma’åmte.

“Para siha na hu chocho’gue este,” ilek-ña si Cruz, matåta’chong gi lamasan piknik gi patio gi apattamento ni’ mapo’luyi i pasiente siha taiguihi guiya. “Ti para guahu.”

I munisipåt na gobietnon Tinian yan Luta mana’guaguaha studio na apattamento para i pasiente saonao si Taimanao yan si Cruz para u fañåga dibåtde. Ma kukubre i gaston elektrisidåt yan transpottasion para yan ginen i apoinmen.��Kada pasiente manrisisibi $100 na salåpe’ gi mes, ni’��inayuyuda siha sa’ i oran��i madaialasis-ñiha yan i probleman hinemlo’-ñiha nina’fanmamappot siha manmacho’cho’.

På’go, 13 na pasiente giya Tinian yan nuebi ginen Luta manmanrisisibi taiguini na setbisio.

Manggef agradesidu i pasiente siha nu i ayudu, låo ti parehu yan i tano’-ñiha. Giya Tinian, mamomoksai si Cruz 80 na babui gi lancho-ña ni’ lokkue’ manånanom chotda, lålanghita yan trongkon lemmon yan ‘nai guaha ti tufungon na månnok. Disde ki må’pos, mama’halomtåno’ ta’lo i gualo’.

Giya Saipan, ha fa’poposgui i ha’åni-ña ni’ daialasis yan puti. Manapåpasi gue’ 91 pesos para i tiket-ña guatu Tinian kada uttimon i simåna sa’ ti ha hulat . Ha katkukula na ginasta gue’ kasi 26 mit pesos gi tiket batkonaire ha’ gi i sais yan lamita años maloffan. Sumåga i asaguå-ña giya Tinian ya annai mana’fampåra i biahe entre i islas, kuåttro meses na ti siña umali’e’. “Malago’ yu’ bai hu siente na gaige yu’ gi sagå-hu,” ilek-ña.

“Ti saga este para guåhu. Ti hu å’agang este såga.”

Mahñao i Makébaban Sentron Daialasis

Si Senadot Paul Manglona, i representånten Luta gi i Lehislaturan i CNMI, hagas ha ke’establesi un sentron daialasis para i taotao-ña mas ki dies años. Gi tinalo’ i 2000 na sakkan siha, i gobietno ma fa’sahnge $1.5 miyon para u ma rinueba un påtte gi Rota Health Center.

I hinatsa kabåles yan makinan mampurifikan hånom yan kuåtto para potlu menos kuåttro na siyan daialasis. Låo ilek-ña si Manglona na ti ma na’siña mababa sa’ tåya’ empleao.

Asta på’go ti mana’sesetbe. Ma’atan gi 2012 na sakkan ya masodda’ na nisisårio na guaha mas para u marinueba gi lugat åntes di siña u mababa.

Ha diseseha si Manglona na i espitat giya Saipan u ga’chong yan kompania para u fanmanhåtsa nuebu na sentro.

I U.S. Renal Care, un kompanian daialasis gi nasion, eståba madiririhi singko na sentron daialasis giya Guam åntes di u ma bende todu gi Ineru 2020 para Fresenius, ni’ dumiririhi i Liberty na sentron daialasis siha yan unu gi i mas dångkulu na kompanian daialasis giya Estados Unidos.

Si Pliny Arenas, i gume’hilulu’i i distriton Hawaii para U.S. Renal Care, ha sångan na åntes di mabende, i kompania ma a’atan i posibilidat i mababan sentron daialasis giya Luta. Låo ma na’måhñao pot i minappot i mañule’ i nisisidåt daialasis ginen lågu para Luta.

Si Scott Sayres, i representanten Fresenius, ilek-ña na i posibilidat i mababan sentron daialasis siha giya Luta ma ebalulua på’go.

“Fio in ibalua opotunidat siha para bai in na’lámeggai i setbision-måmi para i pasiente siha,” ilek-ña. “Meggai na konsiderasion humåhalom gi ayu siha na ebaluasion, ingklusu i håfa mas maolek para i pasiente, nisisidat i empleo siha yan i ginagagao negosio.”

I nisisidåt empleao ti dikike’ na asunto. Si Esther Muña, i direktoran eksekutibu gi espitåt i CNMI, ha estima na i sentron pupbliku para dialysis giya Saipan kumalålamten gi 80 pot siento na inempleha pot i nisisidat mås emfetmera.

I sentro unu ha’ iyo-ña nephrologist ni debidi u na’apåtte yan dos independente na sagan daialasis gi isla. Ilek-ña si Muña na i gaston i ma’emplehan otro na nephrologist siña kahulo’ gi mas ki $300,000 gi sakkan.

Ti sasaonao guenao na estimasion i gaston otro na setbisio siha taiguihi i dietitians yan social workers. Ilek-ña si Muña na siña ha’ listo i fasilidat, låo makkat para u ma’apåsi i tåotåo ni’ sufisiente para u fañåga gi pueston-ñiha.

“Siña ha’ un na’guaha ennao siha na setbisio, låo siempre tåya’ mina’ok para un kontinuha muna’guaha ennåo siha na setbisio,” ilek-ña.

“Håfa na ti siña ta na’fatto i nephrologist mågi Luta kada simåna, kada dos simåna?” mamaisen gue’ gi duranten un interview gi un resturante giya Saipan. “Ni ngai’an ta na’posipble yanggen tåya’ dinisehan pulitika para u sinipotta.”

I asunto mumås petsonåt para i senadot gi alacha disde ki ma’opbliga i asagua-ña na u ma-daialasis.

Ha chagi kumonne’ gue’ guatu para i estådon Washington para u såga yan i hagå-ña guihi para i transplant riñon, låo i mas hihot na daialasis un ora distansia-ña, pues ma muebi siha tatte gi CNMI.

Man Felis Gi Nuebu na Sagan-ñiha

Guaha na pasiente ni’ ma muebi siha guatu Saipan ma sodda’ taimanu para u fampåyon.

“Li’e’, gaige i siboyas-hu guini, yan i donne’-hu ya este na flores i biha munå’i yu’ nu este, si Auntie Rose,” ilek-ña si Harold Manglona mientras ha tanchuchu’i i diferentes masetan tinanom ni mamifila gi patio.

Tumotohge i natibon Luta gi sanhiyong i dikike’ apatamento-ña giya Saipan gi mismo hinatsa nai sumåsaga yan si Cruz yan Taimanao.

Si Harold Manglona, 55 años na idåt, un primon i senadot, hagas gaige Saipan para daialasis singko años.

Carlo Domingo/Civil Beat/2022

"Sen ti parehu."

— Harold Manglona

Lina'la' Giya Saipan

Ilek-ña si Harold Manglona na sen ti parehu Saipan yan Luta, ni' ha abandona i lancho-ña nai mamomoksai babui, guaka, månnok yan binådu yan annai manånom gue' trongkon chotda, lalånghita yan lemon, okra, donne' yan siboyas.

Ha planeha gi tutuhon para u rechåsa i inamte, låo sinehyo’ ni mañe’lu-ña para u cho’gue i daialasis para i famagu’on-ña yan i nieto-ña siha.

Todu i dos saina-ña gai-daiabetes. I idåt-ña si Manglona 49 åños annai ha komprende na gai-daiabetes gue’ lokkue’.

Tenga un biåhi ha’ gi sakkan na siña malak Luta. I tiket $241 pesos para kada petsona guatu yan tatte para i residenten Notte Marianas, pat hihot $500 pesos yanggen sumiha humånao yan i asaguå-ña.

I idåt 55-åños na retirao tåotåo guafi ha adodotna i lamasa gi fi’on i petta ni yininga’ i 11 åños na nietå-ña. Ha bisisita i parentes i asaguå-ña giya Saipan yan humåhanao mamokkat gi kanton i pantalan pat gi tendan dångkulu siha ni ti u sodda’ giya Luta. Bumabaila gi patio guaha na biahi pot para u na’fañålek i mangga’chong-ña pasiente ya u fanmaleffa nu i minahålang-ñiha.

“Hu tåtane’ yu’ para bai hu maleffa håfa hu dingu giya Luta. Esta hu påyuyuni i lina’la’ Saipan,” ilek-ña si Manglona mientras matata’chong gi sanhiyong i iyo-ña studio apartment. “Bula amigu-hu guini på’go.”

Taiguihi as Taimanao yan as Cruz, ha dingu si Manglona i gualo’-ña annai ha muebi gue. I lahi-ña ha bende i guaka-ña si Manglona pot para u apåsi i tiket siha para i familiå-ña pot para u ma bisita si Manglona giya Saipan para i Påsguan Nochebuena.

Tåya’ Sentron Transplant Giya Mariånas

Para meggai na taotao ni manggai chetnot riñon, ti daialasis ha’ guaha na resolusion – i transferen riñon otro. Mas makkat marisibi, låo kada sakkan gi E.U. mit siha na pasiente chumocho’gue.

Ti kulan posibilidat ayu para meggai na pasiente ginen Luta yan Tinian, ni’ ti manpåyon ni hafa ginagagao para i trinansferi yan manchathinasso pot i gasto-ña.

“Kåo mampos yu’ åmko’ para ennao?” manhasso si Rose Sylvia San Nicolas, ni ha muebi gue’ guatu Saipan ginen Tinian. 47 åños na idåt gue’. “Ti hu tungo’. Debidi bai hu muebi yu’ Lågu, otro ennåo na minuebi.”

I Transplant Center gi The Queen’s Medical Center giya Hawaii guaha na biahe machocho’gue transplant achok gaige i pasiente gi 70 åños na idat, yanggen maolek ha’ hinemlo’-ña todu. Guiya ha’ i solu na sentron transplant gi Pasifiku.

Disde 2012, i sentro ha cho’gue transplant para 11 pasiente ginen Guam, Saipan yan American Samoa. Gi halom ayu na tiempo 20 pasiente ginen i Federated States of Micronesia yan 11 ginen i Islas Marshalls manmanrisibi transplant lokkue’.

I sentro tai’infotmasion pot kao guaha pasiente ginen Luta pat Tinian manrisibi transplant riñon.

Si Alan Cheung, i direktot medikåt gi Queen’s Transplant Center, ilek-ña na mayoria pasiente manmannanangga para riñon ginen i matai ya i sentro ha sangångani i pasiente para u ma muebi siha guatu Hawaii kasi sais meses kontiempo åntes di u ma’ekspeta na para u marisibi i riñon. Mayoria mañåga ha’.

“Gi i guaha na ginipon batkonaire, ti pumosipble, pot ihemplo, para u fanggupu insigidas i pasiente ginen Saipan para Oahu para u fanma’opera gigon ha’ manma’ofresi nu i organ i matai,” ilek-ña. “Pot este na rason, in opblibliga i pasiente siha na u ma muebi siha mågi giya Hawaii yanggen esta mangge’hulo’ gi listan mannangga.”

Debidi u fañåga lokkue’ i pasiente siha giya Hawaii un åñu despues di i transplant para u ma kontinuha ma’atan i kondision-ñiha, ilek-ña lokkue’ si Chung.

“Apmam tiempo na fitme i kinahulo’ pasiente. Låo pot hekkua’ håfa na rason kulan tumakhilo’ insigidas.” — si Nikki Villagomez, ni’ gume’hilulu’i i sagan daialasis gi Commonwealth Health Corp.

Ilek-ña si Cruz na munga gue’ mumuebi guatu Hawaii sa’ ti maolek chanså-ña para u fanrisibi nuebu na riñon. Esta ha’ makkat na ha muebi gue’ guatu Saipan. Inifresi lokkue’ ni lahi-ña para u nina’i ni riñon-ña låo ma’åñao na ti u facho’cho’ i otro na riñon i lahi-ña ya uttimo-ña u fanachåparehu yan si tatå-ña, tihu-ña yan tatå-ña bihu.

Ni achokka’ i asigurasion ha kubre mayot gi gaston i transplant, i minuebi para Hawaii siempre guaguan ya nisisårio na u kubre lokkue’ i ginaguan i atkilet yan nengkånno’ gi estådu. Ha hassuyi ha’ si Manglona para u fanresibi transplant låo ilek-ña na ga’ña-ña na u po’lo i salape’-ña para u nå’i i famagu’on-ña yan nieto-ña siha.

I programå-ña medical referral i commonwealth – ni’ umayuyuda meggai na pasiente manresibi inadahen hinemlo’ gi sanlagu – ti ha supopotta i minueben pasiente para transplant sa’ ginagagao na apmam tiempo na u fanmannangga, ilek Villagomez, i direktoran i sentron daialasis Saipan.

Otro na Opottunidat: Daialasis Gi-Gima’

Sigun as Muña i resolusion para i pasiente siha ni’ mañåsaga Tinian yan Luta i daialasis gi-gima’.

I daialasis peritoneal (pot i lugat gi sanhalom i tiyan nai gaige i tilipas, i estomagu yan i higadu) un klåsen daialasis gi-gima’ ni’ siña i pasiente siha ma cho’guen maisa yanggen ma na’chetton gi tiyan-ñiha tubu ni’ ha kukula i haga’. Hemodialysis gi-gima’, ni’ posibilidat giya Hawaii, ti posibilidat giya Luta pat Tinian, ilek-ña si Villagomez.

Si Kongresista Gregorio “Kilili” Sablan mamaisen $391,500 para daialasis peritoneal giya Luta gi 2022 na plånon salåpe’ yan otro $398,250 para Tinian guini na sakkan.

Ilek-ña na ha na’hålom i ginagao sigun gi sine’yo’ Muña, i direktoran eksekutibu gi espitåt. Guaha kasi un dusena na pasienten daialasis peritoneal gi espitåt, kahulo’ ginen må’pos siha na sakkan, låo ma ekspepekta na para u ma na’ládångkulu i progråma.

Låo fine’na debidi i espitåt u ma hulat i lini’an i pasiente siha. Meggai gi ayu siha i mañåsaga Saipan ma tungo’ taotao ni’ mantinatme despues di ma chagi i daialasis peritoneal ya ayu siha na estoria mannina’fanma’åñao para u ma chagen maisa. Sasaonao gi chathinasson-ñiha i taya’ magåhet na ospitåt giya Tinian yan Luta – an tinatme hao siña ha’ ginagagao na un mana’hånao insigidas para i espitåt giya Saipan.

Lokkue’, ti todu kuålifikao para daialasis peritoneal. Debidi u madiklara ni mediku i pasiente siha na ti mangapas ha’ gi tåtaotao låo lokkue’ nahong kåmpo gi gima’-ñiha para u ma cho’gue.

Si Ambrocio Ayuyu, 62 años na idåt, pumåra gi che’cho’-ña ya ha muebi gue’ para Saipan tres åños tåtte para u setbe i asaguå-ña as Rose, 66 años na idåt, ni’ ha nisisita daialasis. I asaguå-ña ti chetnot riñon ha’ malangu-ña låo ha na’sesetbe lokkue’ wheelchair annai ma’utot i addeng-ña.

Ilek-ña si Ayuyu na guiya yan si Rose ma konsidera i daialasis peritoneal, låo ti ma na’siña ma’apåsi i aircon gi gima’-ñiha giya Tinian, annai ma dipepende siha gi fan para u ma kontra i minaipen i isla. Ilek-ña si Ayuyu na masangåni gue’ na nisisåriu aircon para u na’siguru na ti u matulaika i minaipe-ña i kosas daialasis.

Carlo Domingo/Civil Beat/2022

"Gigon tumunok hao påpa’ gi ekso’, todu ha’ gaige."

— Ambrocio Ayuyu

I Mas Silensio na Lugåt

Si Ambrocio Ayuyu, ni ha muebi gue’ yan i asaguå-ña para Saipan pot para u fanresibi inamten daialasis, ha sångan i lina’la’ tåtte gi islå-ña Tinian an ha akompåra yan Saipan.

Un biåhi ha’ na gumai opotunidåt para u falak Tinian disde ha muebi gue’ para Saipan tres años tåtte.

Annai ha dingu Tinian ha dingu meggai gi famagu’on-ña yan nieto-ña siha, yan siento siha na månnok yan ngånga’ gi lancho-ña. Enlugat di macho’cho’ gi lancho, i che’cho’-ña diåriu på’go giya Saipan sumaonao i mama’gåsi yan muna’gåsgas apattamento mientras ha resisibi i asaguå-ña i ma’åmte-ña.

“Tåya’ ofision-måmi gi durånten i ha’åni, pues sumåga ham ha’ yan maigo’,” ilek-ña. Disde ha muebi gue’ guatu Saipan, kumahulo’ minakkat-ña 20 libras ya mas bumåba i iyo-ña cholesterol.

Si San Nicolas, un pasienten Tinian, ti ha planeha ha’ na para u muebi gue’ annai mana’hånao ospitåt ginen Tinian para Saipan gi Ineru 6, 2021. Tåya’ opotunidåt para otro upiñon pat tiempo para u mahassuyi.

Carlo Domingo/Civil Beat/2022

"Lunes, Mietkoles yan Bietnes, macho’cho’ yu’ ginen alas 6 i media asta alas 3 i media. Pues alas 3 i media, mamokkat yu’ hulo’ ya humånao yu’ para i daialasis."

— Rose Sylvia San Nicolas

Mahåhalang Nu I Familiå-ña

Ha akompåpara si Rose Sylvia San Nicolas i lina’lå’-ña giya Saipan yan i lina’lå’-ña giya Tinian. Ti siña ha nangga para u bira gue’ tåtte gi tano’-ña.

Sumen triste gi mes siha annai på’go ha muebi gue’ na malingu gue’ 70 libras. Ha kechagi ma-daialasis i gima’ låo masangåni na debidi u abandona i ga’-ña ga’lågu, un Maltese na klasen ga’lågu mafanana’an Sugar Boy na ha å’agang i lahi-ña, an malago’ para u cho’gue.

Låo despues di un åñu yan siete meses na ha chagu’i i mañe’lu-ña yan i uniku na patgon-ña, ha desidi na para u faisen i asaguå-ña para fina’tinåsi guma’ ga’lågu para si Sugar Boy gi sanhiyong i gima’-ñiha giya Tinian kosaki siña makonsidera para daialasis peritoneal.

I ha’åni-ña siha Saipan pinat cho’cho’ yan inamte yan tåya’ minagof dinannña’ familia ni guaha giya Tinian. An Lunes, Mietkoles yan Bietnes, machocho’cho’ gi un pueston inempleha gi espitåt ginen alas 6 i media asta alas 3 i miedia åntes di u hånao para i daialasis, annai guaha na sumåga asta alas 8 i media gi pupuengi na inatrasao. An Måttes yan Huebes siña ha’ mås umatrasao ha tutuhon macho’cho’ låo sesso gue’ yayas ginen i pa’go mafa’pos na ha’åni.

I manånom yan mañiha yan i ga’-ña ga’lågu yan i asaguå-ña inayuyuda ni minahalang-ña Tinian, låo ti nahong. Mahålang gue’ ni klaru na tåsen Tinian – an umo’mak gi ñatata na tåse-ña Saipan ti parehu. Låo malago’ gue’ para u hihot giya i hagå-ña yan i mañe’lu-ña.

“Gi i guaha na ginipon batkonaire, ti pumosipble, pot ihemplo, para u fanggupu insigidas i pasiente ginen Saipan para Oahu para u fanma’opera gigon ha’ manma’ofresi nu i organ i matai,” ilek-ña.

Mananayuyot Para U Hånao Tåtte

Achok ha chachagi si Harold Manglona i nina’siñå-ña para u kontento giya Saipan, ha diseseha ha’ na u resibi i inamte ni ha nisisita giya Luta.

“Manmalilingu hit an mañåga hit guini Saipan,” ilek Mangloña. “Debi di ta fanggaige månu nai siña guaha ta cho’gue para i familiå-ta yan para hita mismo.”

Un biahi umossitan yan i bisinu-ña as Cruz, “Ayu ha’ na para ta saga giya Tinian yan Luta an gaige hit gi ata’ut.” Låo magåhet ti essitan. Esta si Manglona ha li’e’ sais na pasiente ginen Tinian yan Luta manmåtai — ha tåncho’ i apattamento ni hagas mañåga: unu, tres, ochu. Esta ha’ ha ayek i sagan mahafot-ña giya Luta. Eyugue’ na malago’ na u mahåfot maseha ti siña gue’ esta sumåga guihi.

Umossitan si Taimanao lokkue’ na yanggen ha bira gue’ pot fin tåtte Luta siempre komu katga an måtai. Mahålang pumeskan ayuyu yan binådu giya Luta, yan duda para u chagi giya Saipan nai ti ha tungo’ håyi gai’iyo i tano’.

Ha diseseha si Cruz na u saonao i gobietno yan pribao na kompania para u fanaligao otro manera ni siña ma’ayuda i pasiente siha taiguihi ma ayuda gue’– ya ti para guiya ha’, låo para i pasiente lokkue’ ni para u tinattiyi gue’.

“Kåo para u ma fa’posgue håfa in fa’posgue?” manhasso på’go.

Translated by Brant Songsong. Click here to read this article in English.

This story was produced with support from the USC Annenberg Center for Health Journalism’s 2022 Impact Fund for Reporting on Health Equity and Health Systems, and Civil Beat supporter Dr. Mary Therese Perez Hattori.