������Ƶ

Kā ka luna hoʻoponopono nota: Unuhi ʻia na Ākea Kahikina.�������������here to read this article in English.��

Ua lawa ʻo Lena Spain-Suzuki i nā lua lepo nui ma ka pāka kahakai ma ke awa ʻo Pōkaʻī. I kēlā makahiki aku nei, ua kaha hewa ʻia nā paia o ka lumi hoʻopau pilikia ʻea mālani i nā kahakaha kolohe. Ua kūpaʻi hewa ʻai nā kini ʻōpala a he hauna ko loko.

No laila, ua hui pū ʻo ia me nā kupa no Puʻuhonua o Waiʻanae — he kaiāulu e mālama ʻia nei e nā lewa ma Waiʻanae — no ka hoʻoponopono ʻana i ua pilikia nei.

“Ua ʻōlelo au, ‘E hana pū kākou’ a na mākou i ʻae mai i ke kuleana no ka hoʻomaʻamaʻa ʻia ʻana o kēia wahi,” wahi a Spain-Suzuki.

Ma Novemapa i ka makahiki 2020, ua hoʻonaninani ʻo Spain-Suzuki a me ka hui o nā kupa Waiʻanae a me nā mea ʻaʻa i nā lua hāpaʻupaʻu. Ua hoʻomaʻemaʻe ka hui a puni ka pāka a i loko o nā lua, ua kāpae ʻia ke kahakaha kolohe a ua pena hou ʻia nā paia lua no kekahi pena kiʻi paia na nā mea pena no Oʻahu komohana.

“E mālama hou ana mākou i kēia mau wahi, no ka mea, aia nō mākou a hoʻomaʻemaʻe, na mākou kēia mau wahi. ʻO kēia ko kākou kuleana,” wahi a Spain-Suzuki.

He mea e hopohopo ʻia ka mālama pinepine ʻia o nā pāka no nā kamaʻāina noho kapa komohana e noʻonoʻo ana, ʻaʻole e mālama pono ʻia nei ko lākou mau wahi lehulehu i aloha nui ʻia.

ʻO “hoʻopalaleha ʻia,” “hana ʻino ʻia” a “nānā ʻole ʻia” kekahi mau kāhulu a nā kamaʻāina noho kapa komohana i koho mai ai no ka wehewehe ʻana i nā pāka ma kekahi hanana Civil Beat Talk Story i hala aku nei.

Ua hoʻokumu ʻia ko lākou ukiuki i ka ʻoiaʻiʻo maoli.

“Ke ʻike maka nei mākou i ke kuewa ʻana, ka waiho ʻōpala i kū ʻole i ke kānāwai, ka luku wale ʻana, ka ʻaihue ʻana, ke hana maoli ʻia nei kēlā mau mea a pau,” wahi a Kehau Puʻu, ʻo ia ka hope alakaʻi no ka Department of Parks and Recreation. “ʻO nā pilikia a mākou e ʻike aku nei ma ko mākou kaiāulu, ua hoʻonui ʻia ua pilikia nei ma ko mākou mau pāka.”

ʻO ka luku wale a me ka hoʻomōkakī nā pilikia nui. Wahi a kekahi hōʻoia na ke keʻena hōʻoia o ke kūlanakauhale, ʻo ka luku wale kekahi o nā hihia nui no ka mālama pāka ʻana, no ka mea, ʻaʻole hiki ke mahuʻi ʻia ka hana ʻana a me ke kumu kūʻai.

Ua hoʻomaka ʻo Puʻu ma ke keʻena pāka ma Iune. He kupa ʻo ia no Nānākuli, a kipa pinepine lāua ʻo kona ʻohana i ka pāka kahakai ʻo Kalanianaʻole, a i loko nō o kona puni ʻana i ua wahi nei, ua kuhi nō ʻo ia i ka ʻōpala āna e ʻike pinepine ai ma hope o nā pāʻina kahakai a me nā hopena pule lōʻihi.

No laila, hiki iā Puʻu ke hoʻomaopopo i ke kumu o ko nā poʻe noʻonoʻo ʻana, ʻaʻole e mālama pono ʻia nei nā pāka. Ua noʻonoʻo like pū ʻo ia i kona wā e kamaliʻi ana, a maopopo iā ia, ʻaʻole ʻoi mau loa nā mea ma kona kaiāulu.

“ʻAʻole loaʻa iā mākou ka ʻoi o ka helu no ke olakino a me ka hoʻokele waiwai, akā no ko mākou keʻena, he ʻiʻini ko mākou e hōʻoia i ke kaulike o nā mea a me ka mālama pono ʻana i nā māhele ʻāina a pau,” wahi a Puʻu.

Ua māhele ʻia ko Honolulu mau pāka i ʻelima mua māhele. ʻO ka māhele 3 — ka māhele Komohana — he 93 pāka ko laila mai Wahiawā a i Honouliuli, a me Puʻuloa a i Waiʻanae. ʻO nā pāka me ka ʻoi o ka nui a me ka nui o ke kipa ʻia ʻana e nā kānaka ma kēia māhele ʻāina, wahi a kekahi palapala mai ka makahiki 2016, ʻo ia nō nā pāka ʻo Kapolei Regional, Mākaha Beach, a me ʻEwa Mahiko.

Eia naʻe, me nā pāka he 300 a ʻoi ma ka mokupuni, ua helu ʻia ʻo Honolulu ma ke kūlana he 312 ma o nā kūlana he 319 ke hoʻohālikelike ʻia me nā kalana i kohu like me ua wahi nei ma o ʻAmelika i ka 2020 National Community Survey, ʻo ia ka mea e ana i ka hiki ʻana ke noho ma nā kalana ma o nā mokuʻāina. Ma o nā poʻe i ninaninau ʻia, ua manaʻo ka hapalua a emi, he maikaʻi a i ʻole he maikaʻi loa nā pāka – a ua ʻoi aku ka liʻiliʻi o kēlā helu ma mua o ka helu ʻawelika aupuni.

Aia nō paha ka ʻoluʻolu i nā paka i ke ʻano a lākou e mālama pono ʻia ai. Ua kuhi aku kekahi hōʻike a ka mea hōʻoia kūlanakauhale no ke keʻena, ua kālele ka hapanui o ko nā pāka moʻohelu kālā mālama no ka hoʻomaʻemaʻe ʻāina, ka hoʻomaʻemaʻe kūkulu, a me ka mālama pinepine ʻana i nā pāka ma Honolulu hikina, i loko nō o ka nui liʻiliʻi o nā pāka a me nā luku wale ʻia i palapala ʻia.

ʻO Michael Loftin, he mea hoʻokumu a he luna hoʻokō no 808 Cleanups, ʻike ʻo ia nei i ke komo nui ʻana o nā kānaka ma kā lākou hoʻomaʻemaʻe ʻana ma o ka mokupuni. Ua mālama ka hui mālama ʻāina kumuloaʻa ʻole i ke kāpae mōkakī a me ke kahakaha kolohe ma Oʻahu mai ka makahiki 2014, a ua kāpae lākou i ka ʻōpala he 700,000 paona me nā hoa ʻaʻa he mau kaukani e hōʻea mai ana a me ke alakaʻi ʻana aku i kā lākou mau hanana kaiāulu ponoʻī.

“He mau kānaka hoihoi kākoʻo ko kēlā me kēia kaiāulu. Ma ko ka poʻe ʻaoʻao, aia mau nō nā hoa ʻaʻa ma laila. ʻO kaʻu ʻokoʻa e ʻike ai, aia nō ia ma ka ʻaoʻao aupuni a me kahi a nā kumu waiwai e hāʻawi ʻia aku ai. Wahi a ka ʻike, ʻaʻole paha e hāʻawi ʻia ke Kapa Komohana i nā mea he nui,” wahi a Loftin.

A ʻo ia nō paha ke kumu o ka noʻonoʻo ʻana o nā lālā kaiāulu e kū alakaʻi no ko lākou mau pāka ponoʻī. E hoʻonohonoho i nā hoʻomaʻemaʻe i kēlā me kēia pule. E kāpae pinepine i ke kahakaha kolohe a pena hou. E kiaʻi kaʻahele i kēlā me kēia pō. E hahai i nā papahana hōʻoi ma nā hālāwai alakaʻi kaiāulu. Ua lilo kēia mau hana kaiāulu i kuleana no lākou e palekana a maʻemaʻe mau ai nā pāka.

Aia nā hui he kākini a ʻoi ma nā kapa komohana e mālama ana i nā paka i hiki ke hoʻohana lehulehu ʻia ua mau pāka nei, a na nā lālā kaiāulu ka hapanui o ka hana.

ʻAʻole maʻalahi mau kēia. Ua nuku waha ʻia ʻo Spain-Suzuki no kona hoʻoponopono ʻana i ka pena kiʻi paia. ʻAʻole i hoʻouna ka hui i nā palapala kūpono i ke keʻena pāka, akā ua kānālua ʻo Spain-Suzuki i ke kaʻina hana no ka ʻimi palapala ʻae mai ke kinohi.

“I mea aha ke koina o kaʻu noi ʻāpono no kēia hana, ke hiki ʻole i nā lua ke hoʻomaʻemaʻe pono ʻia? A na mākou iho nō naʻe ka hoʻomaʻemaʻe ʻana?” wahi āna.

Ua ʻōlelo ʻo Puʻu, ua mahalo nui ʻo ia i kona ʻike i ka hana kaiāulu ma Pōkaʻī ma mua o kona hoʻomaka ʻana i kona ʻoihana. ʻO kona ʻike maka ʻana i ka hoʻōla hou ʻia ʻana o ka heiau ʻo Kūʻīlioloa ma ko ke awa palena, ʻo ia nō ka mea i hāʻawi i ka hilinaʻi iā ia e komo i ke keʻena kūlanakauhale.

“He makemake maoli nō mākou e hana me ko mākou kaiāulu e ʻoi aʻe ai kēia mau wahi, no ka mea, na kākou a pau nō kēia mau wahi,” wahi a Puʻu.

I loko nō o kona kuhi ʻana i ke kuleana o ke kūlanakauhale e mālama a e hoʻoponopono i nā pāka, manaʻo ʻo Puʻu, no kākou ke kuleana o ka mālama pāka ʻana.

ʻO ka nīnau nui nona penei, pehea e hana kūpono ai ke kūlanakauhale me ke kaiāulu?

“Mahalo nui maoli mākou i ke kaiāulu no kā lākou hana, akā ua hoihoi mākou i nā manaʻo hou a me nā ʻano hana hou e pili ai kākou a pau,” wahi a Puʻu.

Makemake kekahi o nā kamaʻāina e hōʻoi i ke kūkākūkā ʻana a me ka mōakāka ʻana o ka hana a ke keʻena pāka, akā no kekahi ʻē aʻe, ua paʻakikī ka hōʻeu ʻana i ko lākou kaiāulu ponoʻī. ʻO kekahi haʻina, wahi a Spain-Suzuki, ʻo ia nō paha ka haʻi moʻolelo ʻana e pili ana i kēia mau wahi.

Makemake ʻo Spain-Suzuki e loaʻa kekahi mau hōʻailona aupuni i ka pāka e hōʻike pono i nā moʻolelo e kūikawā ai kēia wahi. Moemoeā ʻo ia i kekahi alahele i mua o ka heiau no nā kūpuna e hoʻoikaika kino ai me ka hōʻihi ʻana i ke kahua kapu. Paʻa ka manaʻo o Spain-Suzuki, ma o ko ke kaiāulu ʻike leʻa ʻana i nā moʻolelo o kēia mau wahi i aloha nui ʻia, e hōʻeu ʻia ana nō lākou e mālama pono i ua mau wahi nei.

“He nui ʻino nā moʻolelo nani no kēia mau wahi a kākou e pili ʻole ai, akā e hoʻi ana nō kākou i laila. Pēlā kākou e kūkulu ai i kaiūlu maoli,” wahi a Spain-Suzuki.

Eia ʻekolu mau pāka ma Kaha Komohana a me nā kānaka e aloha nui i ua mau pāka nei a me ko lākou mau ʻiʻini e mālama pono i kēia mau wahi:

 

Ka Pāka Kahakai ʻO Keaʻau

Ke noho nei ʻo Micah Doane ma Waikele, akā ʻo kona pilina kūikawā i ka pāka kahakai ʻo Keaʻau, ua hoʻomaka ia me kona kupunawahine i hānau ʻia ma Makua. Ua lawe akula ʻo ia iā lākou ʻo kona mau pōkiʻi a me kona mau ʻanakala i kēia mau kahakai komohana, me ke kapa ʻana aku i ua mau kahakai, ua lani ka honua.

Ma ke ʻano he mea hoʻokumu no Protectors of Paradise, ʻo ia hoʻi he hui mālama ʻāina kumuloaʻa ʻole e kālele ana i nā kahakai komohana mai Keaʻau aku, hana ʻo Doane e kiaʻi i ka palekaiko o kona mau kūpuna no kāna mau keiki. Kapa ʻo ia i ka hoʻomōkakī ʻia a me ka luku wale ʻia o kēia mau wahi lehulehu he “hana ʻino” a manaʻo hoʻi ʻo ia, ʻaʻole kūpono ke kamaliʻi ʻana o kāna mau keiki ma nā wahi i waiho wale ʻia a hōʻihi ʻole ʻia.

“Ma ka hapanui o ko kaʻu keikikāne hele ʻana i kahakai, ʻo koʻu hoʻomaʻemaʻe kahakai ponoʻī ke kumu o ka hele ʻana i laila,” wahi a Doane.

He hana hoʻoukiuki nō ia ma muli o ka hoʻomaopopo ʻana, ʻaʻole nō e maʻemaʻe ana kahakai ma hope o ka hala ʻana o kekahi mau hola. Ma o nā makahiki he ʻelima mai ka hoʻomaka ʻia ʻana o kāna hui, ʻōlelo ʻo Doane, ua kāpae ka hui i ka ʻōpala he mau kaukani paona me ka ʻole o ka ʻoi loa aʻe ma hope o ua mau hana nei. No laila, e manaʻolana ana lākou i ka hoʻonui aʻe o ke kōkua mai ke kūlanakauhale mai.

“He maʻalahi nō ka lilo ʻana o ka manaʻolana a me ke kālā, no laila, makemake mākou e ʻike maka i ke ʻano o ke kākoʻo a mākou e hiki ai ke loaʻa mai ke aupuni mai e mau ai kā mākou hana ma laila,” wahi a Doane.

Kuhi pū hoʻi ʻo ia i kekahi hoʻololi ʻē aʻe āna i ʻike ai ma o nā makahiki i hala: ʻo ia ka māhuahua ʻana aʻe o ka nui o nā kōlea kanaka ma nā kahakai komohana.

“Ma mua aku, ua pā ko mākou mau naʻau i ka mehameha, akā ma muli o ka pāpaho pili kanaka, ua lilo ko mākou mau kahakai i wahi kaulana no nā malihini,” wahi a Doane.

ʻO kona moemoeā, ʻo ia nō ka mālama ʻana i papa moʻomeheu ma ka pāka i hiki pū i nā kamaʻāina a me nā malihini ke aʻo i ka ʻāina a me ka mālama ʻāina. Ua hoʻomaka ʻo Doane a me kāna hui i mau kīhāpai ma o ke kapakai o Waiʻanae ma nā pāka like ʻole, me ka manaʻolana ʻana e hoʻoulu ʻia ka hoi o ke kaiāulu e komo pū.

“He mau alahele ko ka ʻāina no ka hoʻohana ʻia ʻana ma waho o ka nanea a me ka walea ʻana,” wahi a Doane.

Ka Pāka Kahakai ʻO Oneʻula

Ua kamaʻāina ko Penelope Parnes mau maka i ka nui o nā hoa ʻaʻa e hoʻomaʻemaʻe ana i ka pāka kahakai ʻo Oneʻula. ʻŌlelo ʻo ia, hōʻea mai nā kūpuna a me nā ʻōpio, nā haumāna a me nā koa kahiko — a me nā kānaka e noho ʻole ma kēlā ʻāina kikoʻī — hōʻea mai lākou a pau e mālama pū i kēia pāka.

Ua noho ʻo ia ma Honouliuli no 15 mau makahiki a ʻoi, a hoʻonohonoho ʻo ia i nā hoʻomaʻemaʻe ʻana ma Oneʻula me ka hana pū ʻana me nā hui ʻē aʻe, e laʻa ʻo ʻEwa Surf Club, ʻo Blue Zones a me ka polokalamu kamaʻāina no JROTC. Ua komo hoʻi ʻo ia iā 808Cleanups ma ka makahiki 2017.

“Ua kāpae mākou i ka ʻōpala he 60,000 paona a ʻoi mai Oneʻula mai a ua hana ʻia pēlā ma muli o ka noke mau ʻana o nā hoa ʻaʻa kaiāulu ma ka mālama ʻāina ʻana,” wahi a Parnes.

ʻO ka pilikia nui āna e ʻike ai, ʻo ia ka nele i kahi alakaʻi kūpono ʻole i koho ʻia e ke kūlanakauhale. Manaʻo ʻo ia, inā koho ʻia kahi kanaka no ka nānā ʻana i ka mālama pāka, e hōʻoi ʻia aku nō ka pāka a e hōʻoia ʻia ke kuleana.

Manaʻo pū hoʻi ʻo Parnes, he pono ko ke keʻena pāka hoʻonui ʻana i ka hana pū ʻana me ke kaiāulu. Ma kekahi o kona hālāwai ʻo ʻEwa Neighborhood Board Parks Committee, ua hāpai manaʻo aʻe ka hui i papahana hoʻolālā hōʻoi e laʻa ka hōʻiliʻili alahele a me ka hoʻākea ʻana i ka māhele kahakai. I ko lākou hoʻouna ʻana aku i ua papahana nei i ke keʻena pāka, ua ʻōlelo ʻo Parnes, ua haʻi ʻia ʻo ia e kali a hiki i ko ke keʻena nānā ʻokoʻa ʻana i ka hopena o ua papahana nei ma ka ʻāina.

“ʻAʻole nō hiki ke ʻimi i mau wahi pane i nā nīnau, keu hoʻi ka hoʻomaka ʻana i kahi pilina hana,” wahi a Parnes.

Ma kekahi hālawai ʻo ʻEwa Neighborhood Board i hala aku nei, aia ʻo Parnes ma laila, ʻoiai he lālā papa ʻo ia, a nāna i haʻi aku i ke alakaʻi no ke keʻana pāka ʻo Laura Thielen, he makemake kona kaiāulu i kahi pilina e ʻoi aʻe ai ka maikaʻi me nā limahana pāka.

“Makemake wau e kākoʻo i nā hana like ʻole e holo aku nei. Ua aloha nui ʻia nō nā pāka, akā e aloha nui ʻia nō hoʻi ua mau pāka nei a make, no laila, he pono ke kōkua ʻia ʻana o mākou,” i pane aku ai ʻo Thielen.

Makemake wale nō ʻo Parnes e ʻike i ka pau ʻana o ka hōʻoi pāka ʻana e like me ka mea i hoʻohiki ʻia. Ua hoʻolālā ka papahana ʻo Oneʻula Beach Park Master Plan i ʻelua mau lumi hoʻopau pilikia, hoʻokahi kikowaena kaiāulu a me kekahi kahua kinipōpō no kēlā ʻāina ʻo ʻEwa. Ma kēia manawa, hoʻokahi wale nō lumi hoʻopau pilikia o ka pāka.

“Ua kuʻupau ke kaiāulu i ka hana e like me ka mea i hiki e mālama pono ʻia ai ko mākou mau pāka,” wahi a Parnes, “Kono wau iā haʻi e ʻike mai i ko mākou mālama ʻana me ka puʻuwai a me ka lima.”

Ka Pāka Kahakai ʻO Pōkaʻi Bay

Ua hānai ʻia ʻo Lena Spain-Suzuki ma kahi i hoʻokahi mile mai ka pāka kahakai ʻo Pōkaʻi Bay. Aia i laila ka ʻoi o kona mau haliʻa aloha — mai nā pāʻina lā hānau a i ka holoholo wale ʻana ma nā hopena pule. Hoʻomanaʻo ʻo ia i ka pāʻani ʻana ma ko ke awa paia pōhaku, me ka pā ʻana o ka naʻau i ke kaiāulu ʻana me nā keiki kupa ʻē aʻe.

“He mea ʻole inā no Mākaha kekahi, a no Lualualei kekahi. Ua pāʻani pū wale mākou,” wahi a Spain-Suzuki.

Mai ka hana ʻia ʻana o ka pena kiʻi paia i kēlā Novemapa aku nei, ua mālama lāua ʻo kona “koa ʻāina” i nā hoʻomaʻemaʻe a me nā ʻākoakoa like ʻole ma ka pāka. Ua hōʻea mai ma kahi o 200 mau hoa ʻaʻa ma Pepeluali e hoʻomaʻemaʻe i kahakai, ke kahua pāʻani, a me ka heiau. Ua hana pū ʻo ia me ke kaiāulu lewa e noho ana ma ka pāka, me ke kaukaʻi ʻana iā lākou e kū lawelawe maikaʻi no ka ʻāina, a lawe pinepine mai ʻo ia i ka mea ʻai a me nā mea pono, a hoʻopili ʻo ia i nā mea a me nā wahi kōkua kanaka nele.

ʻO ka nuʻu o kona lanakila, wahi āna, ʻo ia nō kona ʻike maka ʻana i ka hana pū ʻana o nā kūpuna kupa a me nā lālā kaiāulu hale ʻole i nā lei no ka hoʻohanohano ʻana i ka lā mua o Mei. Ua hoʻokani pila ka hui a ua hula aku ʻo Spain-Suzuki no kona mau hoa. Ma kekahi o kona Lā Kupuna, ua noho pū lākou ma ka mauʻu a ua walaʻau ʻia ka wā e hiki mai ana no ko lākou awa ʻo Pōkaʻī.

“ʻO ka mālama ʻāina pono ʻana, ʻo ia nō ka hoʻokomo ʻana i nā kānaka a pau ma kou kūlanakauhale a me ka hana ʻana i ka mea e kūpono ai ka ʻāina āu e noho ai,” wahi a Spain-Suzuki.